Sporti në Zl! Aksidenti tragjik i merr jetën futbollistit të njohur shqiptar

Vlora është zgjuar këtë të diel me një lajm të trishtë. Ka ndërruar jetë Pandeli Opingari, një nga figurat më të respektuara të sportit vlonjat dhe ish-lojtar i ekipit të Flamurtarit, pas plagëve të rënda të marra në një aksident rrugor dy ditë më parë.

Ngjarja e rëndë u shënua më 2 janar, në rrugën “Demokracia” në qytetin e Vlorës. Sipas informacionit zyrtar, Opingari, 96 vjeç, po kalonte rrugën në vijat e bardha, kur u godit nga një automjet tip “Audi”, i drejtuar nga një i ri 22-vjeçar me inicialet O.A. Përplasja rezultoi fatale për të moshuarin, i cili pësoi dëmtime të rënda trupore.

Menjëherë pas aksidentit, Pandeli Opingari u transportua me urgjencë në spital, ku u mbajt për disa orë nën kujdes intensiv. Mjekët bënë përpjekje të vazhdueshme për ta stabilizuar, por për shkak të moshës së thyer dhe plagëve të rënda, ai nuk arriti të mbijetojë dhe ndërroi jetë këtë të diel.

Policia ka arrestuar drejtuesin e mjetit dhe ka nisur procedurat ligjore për zbardhjen e plotë të rrethanave të aksidentit. Hetimet vijojnë për të përcaktuar përgjegjësitë dhe shkaqet e ngjarjes.

Lajmi për ndarjen nga jeta të Pandeli Opingarit, i njohur nga miqtë dhe sportistët edhe si “profesor Pompi”, ka shkaktuar dhimbje të thellë në qytetin e Vlorës. Ai ka qenë pjesë e Flamurtarit në vitet ’60–’70, mësues i edukimit fizik, trajner dhe edukator i brezave të rinj, duke lënë një gjurmë të pashlyeshme në sportin dhe jetën qytetare.

Një jetë e tërë e përkushtuar sportit, disiplinës dhe edukimit u mbyll në mënyrë tragjike, duke rikthyer edhe një herë vëmendjen te siguria rrugore dhe mbrojtja e këmbësorëve.

🕊️ Kujtimi i Pandeli Opingarit do të mbetet i gjallë në historinë e sportit vlonjat.